Астанада «Цифрлық армия» күні өтті
13.02.2019 15:32

Қазақстан Республикасының Қорғаныс министрлігі «Astana Hub» ІТ – стартап халықаралық технопарк алаңында  «Цифрлық армия» күнін ұйымдастырды. Оның ашылуы Премьер-Министрдің орынбасары – Қорғаныс және аэроғарыш өнеркәсібі министрі Асқар Жұмағалиев және Қорғаныс министрі Нұрлан Ермекбаевтың қатысуымен өтті.

«Бүгінде «Цифрлық Қазақстан» бағдарламасы шеңберінде қорғаныс пен қауіпсіздікті қамтамасыз ету үшін заманауи технологиялар қолданылады. Қорғаныс өнеркәсібіндегі қызметтің негізгі басымдығы қазақстандық ұсталымды арттыру болып табылады. Осы жұмыс үшін ІТ –технологиялар саласындағы отандық әзірлеушілер тартылады. Бұл ақпараттық технологиялар мен киберқауіпсіздік аясында жас мамандарға арналған жаңа жұмыс орындарын құруға мүмкіндік береді», - деді А. Жұмағалиев.

Аталмыш шара заманауи техникалық құралдар және бағдарламалық қамтамасыз етумен жабдықтау мәселелері бойынша Қорғаныс министрлігі және Қазақстан Республикасының өзге де әлеуетті ведомстволарымен ІТ-технологиялардың ұлттық өндірушілері және  әзірлеушілерімен өзара іс-қимылды ұйымдастыру  мақсатында өткізіледі.   

«Цифрлық армия» күні барысында отандық операциялық жүйе мен дерекқор жүйесін, ұшқышсыз жүйелер мен тренажерларды, автономды режимде әртүрлі дереккөздерден ауқымды деректерді жинауды, талдауды және алынған ақпарат негізінде ахуалды модельдеуді, сондай-ақ қабылданған шешімдерді әрі қарай іске асыруға қабілетті «ақылды» өзін-өзі оқыту бағдарламалық-аппараттық кешендерді құру жөнінде 40 ұлттық  IT-компанияның презентациясы өтті.

Іс-шара қорытындысы бойынша Қорғаныс министрлігі, Қорғаныс және аэроғарыш өнеркәсібі министрлігі, «Зерде» ұлттық ақпараттық коммуникациялық холдингі, «Атамекен» кәсіпкерлер ұлттық палатасы және Қазақстан ІТ – компаниялары ассоциациясы арасында бес жақты меморандумға қол қойылды. 

 

Қазақстандық шынжыр табанды көліктер экспортқа шығарылды
13.02.2019 15:29

«Семей машина жасау зауыты» («Қазақстан инжиниринг» ҰҚ» АҚ-ның еншілес кәсіпорны) шынжыр табанды тасымалдағыш көлікті экспортқа шығара бастады. Аталмыш техникалардың 4 данасы Ресейге жөнелтілді.

«Семей машина жасау зауыты» бүгінде ТМД аумағында осындай техникаларды шығаратын бірден бір кәсіпорын болып табылады.

Зауыттың Бас директоры Нұрлан Омаровтың айтуынша  қазір кәсіпорын шығаратын техникаларда қазақстандық өнімнің үлес салмағы өте жоғары және олар барлық талаптарға сай, сондай-ақ өздерінің сипаттамалары бойынша шетелдік өнімдерден еш қалыспайды.

Шынжыр табанды тасымалдағыш көлік жолдағы кедергілерден өтімділігі жоғары, жылдам жүре және жүзе алатын, жүк таситын, алдыңғы доңғалақтары тартқыш машина болып табылады.

Бұл көліктер өте қолайсыз климаттық жағдайларда (ұйық батпақты, қарлы, орманды, таулы және шөлейт аймақтарда) қоршаған ортаның температурасы от + 60 градустан – 70 градусқа дейін жететін жерлерде пайдалануға арналған.

 

Асқар Жұмағалиев Астана, Алматы қалаларындағы қорғаныс-өнеркәсіп кешендері кәсіпорындарын аралады
13.02.2019 15:28

ҚР Премьер-Министрінің орынбасары – ҚР Қорғаныс және аэроғарыш өнеркәсібі министрі Асқар Жұмағалиев Киров атындағы Машина жасау зауытының, № 405 Авиажөндеу зауытының, «СКТБ» Гранит» ЖШС, «Қазақстан авиациялық индустриясы» ЖШС, «Еврокоптер Қазақстан инжиниринг» ЖШС, «Қазақстан Аселсан инжиниринг» ЖШС және «Қазақстан Парамаунт инжиниринг» ЖШС қызметімен танысты.

Сапар барысында Жұмағалиевке елдің қорғаныс-өнеркәсіп кешені кәсіпорындарының өндірістік қуаты мен шығарылатын өнімдерінің номенклатурасы көрсетілді. Сондай-ақ, зауыт басшылары өз кәсіпорындарын дамыту жоспарлары туралы министрді хабардар етті.

Өз кезегінде Асқар Жұмағалиев қазіргі уақытта ҚР Парламенті Сенатының қарауында жатқан «Қорғаныс өнеркәсібі және мемлекеттік қорғаныс тапсырысы туралы» ҚР жаңа Заңының жобасы, сондай-ақ саланы дамыту жоспарлары туралы айтып берді. Атап айтқанда, ол бүгінде министрлік үшін негізгі басымдық еліміздің қорғаныс-өнеркәсіп кешеніндегі қазақстандық қамтуды арттыру болып табылатынын атап өтті.

Мемлекеттік қатысу үлесі бар кәсіпорындарға бару барысында Премьер-Министрдің орынбасары олардың тиімділігін бақылау үшін нақты KPI әзірлеу қажеттілігіне назар аударды, сондай-ақ жұмыс істеп тұрған зауыттарда тәжірибесі мен құзыреті бар кәсіпорындардың тек бейінді бағыттарын дамытудың маңыздылығына назар аударды.

«Бізде әскери мұқтаждықтар үшін жоғары технологиялық жабдықтар өндірумен айналысатын бірегей зауыттар бар. Олар осы векторда жұмыс істеуді жалғастыруы тиіс. Мемлекет басшысы мемлекеттік кәсіпорындар жеке бизнеспен бәсекеге түспеуі тиіс екенін үнемі айтады. Осыны ескере отырып, даму жоспарын құру қажет», - деді А. Жұмағалиев.

Зауыттарға бару қорытындысы бойынша ҚР Премьер-Министрінің орынбасары – Қорғаныс және аэроғарыш өнеркәсібі министрі ӨҚК кәсіпорындарын дамытуға қатысты бірқатар басқа да тапсырмалар берді. Барлық мүдделі кәсіпорындарға осы мәселе бойынша бірыңғай көзқарасты қалыптастыру үшін саланы дамыту бойынша өз ұсыныстарын ұсыну айтылды.

Анықтама: «№ 405 авиажөндеу зауыты» АҚ түрлі үлгідегі әскери және азаматтық мақсаттағы тікұшақтарды, авиациялық-техникалық мүлікті күрделі жөндеумен және техникалық қызмет көрсетумен айналысады.

Деятельность «Машиностроительного завода им. С.М. Кирова» АО «НК «Казахстан инжиниринг» МОАП РК заключается в производстве изделий гидравлики, модернизации и восстановительном ремонте спец. изделий, запчастей для изделия ЖД и горнодобывающего сектора.

"Қазақстан инжиниринг "ҰК "АҚ" Киров атындағы Машина жасау зауытының қызметі гидравлика бұйымдарын өндіру арналған қосалқы бөлшектер жасау болып табылады.

"Гранит" СКТБ" ЖШС радиоэлектроника, телекоммуникация, байланыс және ақпараттық технологиялар саласында аспаптар мен жүйелерді өндіреді.

"Қазақстан Парамаунт инжиниринг" ЖШС брондалған техника шығарады ("Арлан", "Номад", "Алан", "Барыс 8Х8" және 6х6).

"Еврокоптер Қазақстан инжиниринг" ЖШС тікұшақтарды іске асырумен, техникалық қамтамасыз етумен және ұшу-техникалық құрамын оқытумен айналысады.

"Қазақстан Аселсан инжиниринг" ЖШС электронды және электронды-оптикалық өнімдер бөлігінде ҚР қорғаныс өнеркәсібінің міндеттерін атқарады.

«Иркут» корпорациясы Су-30СМ жойғыштарын жаңартудың жаңа пакетін әзірледі
31.01.2019 16:04

2019 жылғы 30 қаңтарда РФ Қорғаныс министрі Сергей Шойгу «Иркут» корпорациясының филиалы – Иркут авиациялық зауытына барды, онда Ресей армиясы мен ҰҚШҰ-ға қатысушы елдер үшін Су-30СМ көп мақсатты жойғыштарын өндіру және жаңғырту барысымен танысты.

Әскери ведомство басшысына Су-30СМ ұшақтарының екі эскадрилі қазірдің өзінде Қазақстанның ӘӘК-нің қарулануына қабылданып, жеткізу жалғастырылатының баяндады. 2019 жылы Белоруссия Қарулы күштері
Су-30СМ жойғыштарының бірінші партиясын қабылдауға дайындалуда.

Ресей Әуе-ғарыш күштерінің және теңіз авиациясының құрамында осы типтегі 100-ден астам жауынгерлік машиналар бар. Зауыттағы жетекші жойғыштардың арқасында олардың жауынгерлік мүмкіндіктері артуда: әуе нысаналарын анықтау және тану алыстығы ұлғаюда, қару-жарақ құрамына бірнеше жүз километр қашықтығына әуе, жер үсті және теңіз мақсаттарын зақымдаудың жаңа жоғары дәлдіктегі құралдары енгізілуде.

Су-30СМ жойғыштарын жаңғырту РФ Қорғаныс Министрлігінің тапсырысы бойынша «Иркут» және «ОКБ Сухого» корпорацияларының күшімен, ресейлік қорғаныс-өнеркәсіп кешенінің бірқатар жетекші кәсіпорындарының қатысуымен жүргізіледі. 

Сынақтар аяқталғаннан кейін техникалық жетілдіру жаңа Су-30СМ жойғыштарын құрған кезде, сондай-ақ тапсырыс берушілерге бұрын жеткізілген ұшақтарды жөндеу және жаңғырту барысында енгізілуі мүмкін.

 

Дереккөзі: https://военное.рф/2019/Оборонка4/

Қазақстанда Ми-8АМТ/Ми-171 тікұшақтарын ірі тораптық құрастыру жүзеге асырылады
25.01.2019 00:03

 

 

Бүгін Астанада ҚР Қорғаныс және аэроғарыш өнеркәсібі министрлігіне қарасты «Қазақстан инжиниринг» ҰҚ» АҚ, «№ 405 Авиажөндеу зауыты»  мен «Ростех» корпорациясына қарасты «Вертолеты России» АҚ арасында Ми-8АМТ/Ми-171 тікұшақтарын ірі тораптық құрастыруды Қазақстанда ұйымдастыру туралы Келісім-шартқа қол қойылды.

Аталған құжат Қазақстан Республикасы Президенті Н.Ә.Назарбаев пен Ресей Федерациясының Президенті В.В.Путин арасындағы бұрын қол жеткен уағдаластық негізінде жасалды. 

Тікұшақтарды құрастыру және оны тапсырыс берушінің талабына сай бейімдеу «№ 405 Авиажөндеу зауыты» АҚ өндірістік алаңында іске асырылмақ. Аталған кәсіпорын Ми-8АМТ/Ми-171  тікұшақтарын жөндеу, жетілдіру және техникалық қызмет көрсету үшін қазақстандық және халықаралық органдардың сертификаттарын иеленген.

Сондай-ақ бұл тікұшақтардың осы түрін қауіпсіз пайдалануды қамтамасыз етуге біліктілігі сай келетін Қазақстандағы бірден бір кәсңіпорын.

Сонымен қатар, Қазақстанда ауыр тікұшақтарды құрастыру технологиясы  тұңғыш рет енгізіліп отырғанын және оның бюджеттік инвестицияларды тартпай ұйымдастырылатынын айта кету керек.

Тікұшақтарды құрастыру өндірісі отандық қорғаныс өнеркәсібін, азаматтық тікұшақ индустриясын және оқу-жаттығу базаларын едәуір дамытуға мұрындық болады.

Қазір Ми-8АМТ/Ми-171  тікұшақтарына негізігі тапсырыс берушілер мемлекеттік мекемелер мен коммерциялық әуе компаниялары. 

 

 

Анықтама: Ми-8АМТ/Ми-171 тікұшақтарын М.Л. Миль атындағы Мәскеу тікұшақ зауыты жасаған және олар жолаушылар тасуға, салмағы 4000 кг дейін жүктерді кабина ішінде немесе сыртта іліп тасымалдауға, іздеу-құтқару жұмыстары мен өрт сөндіруге арналған. Қазір Орталық және Оңтүстік-Шығыс Азияда, Таяу Шығыста, Еуропада, Латын Америкасында және ТМД елдерінде 1000-нан астам осы тікұшақтың түрлі модификациясы пайдалануда.

 

Асқар Жұмағалиев Қазақстан Республикасы Премьер-министрінің орынбасары – Қазақстан Республикасы Қорғаныс және аэроғарыш өнеркәсібі министрі болып тағайындалды
27.12.2018 13:48

2018 жылы 26 желтоқсанда Асқар Жұмағалиев Мемлекет басшысының Жарлығымен Қазақстан Республикасы Премьер-министрінің орынбасары – Қазақстан Республикасы Қорғаныс және аэроғарыш өнеркәсібі министрі болып тағайындалды.

Асқар Жұмағалиев 1972 жылы РКФСР Орынбор облысында дүниеге келген.

Свердлов Суворов әскери училищесін тәмамдаған.

Кейін Қазақ ұлттық техникалық университетін (Алматы қ.) «Радиобайланыс, радиотарату және теледидар» мамандығы бойынша аяқтаған. 

Екінші жоғары білімін Қазақ гуманитарлық-заң университетінде «Құқықтану» мамандығы бойынша алған.

Лозаннаның федеративтік политехникалық мектебінен «Электрондық басқару саласының магистрі» ғылыми дәрежесін алған.

1996–1998 жылдары «Жарық» ЖШС бас директорының қызметін атқарған;

1998–1999 жылдары ҚР Көлік және коммуникация министрлігінің сектор меңгерушісі ретінде еңбек еткен;

1999–2000 жылдары - ҚР Көлік және коммуникация министрлігінің Көліктік бақылау комитетінің бас маманы, бөлім бастығы болған;

2000 жылы «Телекоммуникациялық трафик биллингі республикалық орталығы» РМК-да басқарма басшысы ретінде жұмыс істеген;

2001–2003 жылдары – ҚР Байланыс және ақпараттандыру комитеті төрағасының орынбасары, байланыс саласындағы мемлекеттік қадағалау басқармасының басшысы;

2003–2005 жылдары – ҚР Ақпараттандыру және байланыс агенттігі төрағасының орынбасары;

2004–2005 жылдары – ҚР Ақпараттандыру және байланыс агенттігі төрағасының м.а.;

2005–2006 жылдары – ҚР Ақпараттандыру және байланыс агенттігі төрағасының бірінші орынбасары;

2006 жылы ҚР Ақпараттандыру және байланыс агенттігінің төрағасы қызметін атқарған;

2006–2010 жылдары — «Қазақтелеком» АҚ президенті;

2010–2012 жылдары – ҚР байланыс және ақпарат министрі;

2012–2014 жылдары – ҚР көлік және коммуникациялар министрі лауазымын атқарған;

2014 жылы – ҚР байланыс және ақпарат агенттігінің төрағасы;

2014–2015 жылдары – ҚР инвестициялар және даму министрінің орынбасары;

2015-2017 жылдары «ҚазАтомӨнеркәсіп» ҰАК» АҚ-ның басқарма төрағасы қызметін атқарған.

2017 жылғы тамыз айынан Қазақстан Республикасы Премьер-министрінің орынбасары қызметін атқарған.

 

ҚР ҚАӨМ отандық кәсіпорындардың мемқорғаныстық тапсырысқа қатысуын шектемейді
24.12.2018 11:56

Заңды тұлғалар бірлестігін (консорциум) «Қорғаныс өнеркәсібі және мемлекеттік қорғаныстық тапсырыс туралы» ҚР Заңы жаңа жобасында (заң жобасы) мемлекеттік қорғаныстық тапсырысты (МҚТ) орындаушылар ретінде қатысуын шектеу туралы БАҚ-та таралған ақпараты дұрыс болып табылмайды.

Консорциумның мемқорғаныстықтапсырысты іске асыруға қатысуы үшін ешқандай шектеулер жоқ. Елдегі қолданыстағы заңнамаға сәйкес консорциумдар мемлекеттің кез-келген саласына, оның ішінде МҚТ-ға қатыса алады.

«Консорциум» түсінігі заң жүзінде Қазақстан Республикасының Азаматтық кодексінде бекітілгенін ескереміз. Заң жобасында кәсіпорындар Отандық тауар өндірушілер, жұмыстар мен көрсетілетін қызметтерді берушілер тізілімі (Тізілім) талаптарын сақтаған жағдайда, консорциумға қатысуға мүмкіндік берілген.

Отандық өндірушілердің консорциумға бірлесуі мемқорғаныстықтапсырысты орындаушыларды таңдау кезінде үлкен мән беретін, соңғы өнімде қазақстандық қамту үлесін ұлғайтуға мүмкіндік береді.

Өз тарапынан ҚР Қорғаныс және аэроғарыш өнеркәсібі министрлігі басқа өндірушілерге қарағанда 10%, мүмкін 20% жоғары баға болған кезде де тауарларды шығару, жұмыстарды орындау, қызметтерді көрсету кезінде отандық қамту үлесін жоғары ұсынатын өндірушілердің пайдасына таңдауды жүзеге асыру (өзге де бірдей талаптар кезінде) мүмкіндігі нормаларын МҚТ-ны қалыптастыру, орналастыру және орындау қағидаларында қарауға дайын.

Отандық жеңіл өнеркәсіп кәсіпорындары үшін, МҚТ-ға қатысуға шектеу қойылмайтынын ескереміз. Көптеген кәсіпорындар, Тізілімге енгізу үшін біліктілік талаптары сәйкес осы саладағы дайын өнімді өндірушілер бұрынғыдай МҚТ-ға қатыса алады.

«Жасампаз» консорциумына нақты келсек, қазіргі уақытта оған қатысушылар Тізілімде берілген, сондықтан өндірісті жабу не жеңіл өнеркәсіптің 6 мың жұмыскерін қысқарту туралы сөз жоқ.

Бұдан басқа, 2019 жылға қорғаныстық тапсырысты жоспарлау ағымдағы жылғы мамырда аяқталған, сондықтан қолданыстағы заңнамалық нормалар, МҚТ-ны қалыптастыру, орналастыру және орындау бөлігінде 2020 жылғы 1 қаңтарға дейін қолданыста болады.

Жеңіл өнеркәсіп үлесі өнеркәсіптік өндіріс көлемінде 0,4%, ал өңдеу өнеркәсібінде 1% құрайтынын ескеру қажет. Бұл осы саланың біздің еліміздің экономикасына әсер етуі басқа салалармен салыстырғанда тұтастай шамалы екенін көрсетеді.

ҚР ҚАӨМ өз құзыреті шегінде отандық жеңіл өнеркәсіпке жан-жақты қолдау көрсетуде, заң жобасында МҚТ құрамында тауарлар номенклатурасын кеңейту бекітілген.

Егер бұрын мемқорғаныстықтапсырыс құрамында әлеуетті органдар үшін әскери және арнайы киім нысанын, айырым белгілерін және жеке қорғану құралдарын шығару ғана болса, қазір заң жобасында барлық киім-кешек мүлкін, төсек орын мен ішкі киімге дейін қосу бекітілген. Бұл жеңіл өнеркәсіп кәсіпорындары үшін МҚТ көлемін ұлғайтуға мүмкіндік береді, ол оны қолдау шараларының бірі болады, сондай-ақ оларға өндірісті және жұмыс орындарын көбейтуге мүмкіндік береді.

Консорциумды мемқорғаныстықтапсырысты орындаушыларға қосу туралы түзетуге қатысты ұсынысты ҚР Парламенті Мәжілісінің депутаттары ұсынған, бұл ретте бұл түзету консорциумның мемқорғаныстықтапсырысқа толық қатысуы мәселесін шешпеген.

Осыған байланысты ҚР Үкіметі консорциумға қатысушылардың жауапкершілігі, консорциумдарды Тізілімге енгізу және шығару тәртібі және басқа да маңызды факторлар бөлігінде республиканың қолданыстағы заңнамасында олқылықтар мен коллизияларға жол бермеу мақсатында, заң жобасында қосымша нормалар белгілеу талабымен осы түзетуді қолдау туралы қорытынды берген.

Осы мәселелер ҚР Парламенті Мәжілісінде талқыланған, одан кейін оны басқа заң жобалары шеңберінде талқылау мүмкіндігімен түзету заң жобасынан алынған, себебі ол осы тақырыпқа терең және кешенді қарауды талап етеді және ҚР қолданыстағы заңнамасына қосымша өзгерістер енгізуді көздейді.

Өз тарапынан ҚР ҚАӨМ осы заң жобасын қабылдау шеңберінде ғана емес, МҚТ-ны іске асырудың басқа мәселелері кешенінде де осы тақырыпта барлық мүдделі әріптестермен «ашық диалогқа» және талқылауға дайын.

2019 жылдан бастап украиндық қорғаныс НАТО стандарттары көшеді
21.12.2018 16:19

"Укроборонпром" мемконцерн 2019 жылдан бастап НАТО стандарттарына көшеді, үдерісті 2020 жылдың соңына қарай аяқтауды жоспарлап отыр. Бұл туралы 2018 жылғы 20 желтоқсанда РИА Новости компанияның баспасөз қызметіне сілтеме жасай отырып хабарлайды.

2019 жылдан бастап қару-жарақ пен әскери техниканы өндіру бойынша натолық техникалық стандарттарды іс жүзінде енгізу басталады. Мұндай шешім Украина-НАТО 27-ші бірлескен жұмыс тобының отырысында қабылданды.

 "Украиндық ҚӨК жаңа стандарттарына көшуді жеделдету үшін
2019 жылдың жазында НАТО-ның техникалық сарапшылары әуе құрылысы мен радиолокация кластерлеріне кіретін "Укроронпром" кәсіпорындарына барады. Бейімдеу процедураларын аяқтау және НАТО стандарттарын Украинаның қорғаныс секторы мен қорғаныс-өнеркәсіптік кешенінің басшылық құжаттарына толық имплементациялау 2020 жылдың соңына жоспарланған", – деп қосты "Укроронпром"баспасөз қызметінде.

2018 жылғы шілде айында "Укроборонпром" НАТО стандарттары бойынша ПГОФ-40 автоматты гранатометі үшін оқтарды шығара бастағаны белгілі болды.

 

Дереккөз: https://военное.рф/2018/Украина93/

Top