ҚР Премьер-Министрі Бақытжан Сағынтаев Қызылорда облысына жұмыс сапары барысында «Байқоңыр» ғарыш айлағының мысалы негізінде еліміздің ғарыш саласының дамуымен, сондай-ақ Байқоңыр қаласын одан әрі көркейту жоспарымен танысты. Бақытжан Сағынтаевқа нысанды аралау кезінде ғарыш саласын дамытудың қазіргі жағдайы мен алдағы жоспарлар, сонымен қатар «Байқоңыр» кешеніндегі ынтымақтастық туралы тұжырымдаманы іске асыру барысы, оның ішінде инвестицияларды тарту бойынша атқарылып жатқан жұмыстар туралы баяндалды.
ҚР қорғаныс және аэроғарыш өнеркәсібі вице-министрі М. Нұрғожин және «Росғарыш» мемлекеттік корпорациясының бас директорының орынбасары А. Мазурин «Байқоңыр» ғарыш айлағын одан әрі дамыту жоспарымен таныстырды. Өз кезегінде, Қызылорда облысы әкімінің орынбасары С. Қожаниязов пен қала әкімшілігінің басшысы К. Бусыгин Байқоңырды ұзақмерзімді дамытудың бірлескен бағдарламасын орындау туралы айтып берді. Қазіргі таңда қаланы табиғи газбен қамтамасыз ету және тұрғын үй құрылысы жұмыстары басталған, сумен жабдықтау және су тарту жүйелерін реконструкциялау және жаңғыртудың дайындық жұмыстары жүргізіліп, әлеуметтік мәселелерді шешу бойынша шаралар қабылданып жатыр. Еске сала кетейік, Бақытжан Сағынтаев Елбасы тапсырмасы бойынша кеше жұмыс сапарымен Оңтүстік Қазақстан облысына барды. Сапардың мақсаты — Президент Нұрсұлтан Назарбаевтың «Қазақстанның үшінші жаңғыруы: жаһандық бәсекеге қабілеттілік», «Төртінші өнеркәсіптік революция жағдайындағы дамудың жаңа мүмкіндіктері» Жолдаулары мен Бес әлеуметтік бастамасы аясында берген тапсырмаларының жүзеге асырылу барысымен танысу. Бүгін Премьер-Министрдің Қызылорда облысына жұмыс сапары аяқталды.
